नयाँ आशा एफएम ,
जनकपुरधाम, ५ फागुन । धनुषाको विदेह नगरपालिकाका प्रमुख प्रशासकिय अधिकृत दीपेन्द्र कुमार साहले विवादित परिस्थितिमा ८३ कर्मचारीलाई बर्खास्त गरेका छन् ।
नगरप्रमुख र प्रमुख प्रशासकिय अधिकृत बीचको सम्बन्ध जटिल भइरहेको समयमा उक्त निर्णय गरिएको हो ।
प्रमुख प्रशासकिय अधिकृत साहले नगर प्रहरी, डोर हाजिरी, नयाँ नियुक्ति लगायतका विभिन्न विभागका कर्मचारीलाई बर्खास्त गरेका छन् ।
नगर प्रहरीतर्फ असईदेखि प्रहरीसम्मका १२ जना कर्मचारी, नयाँ नियुक्ति गरिएको १० जना, डोर हाजिरीमा कार्यरत ३५ जना कर्मचारी, करार सेवामा ६ महिना र १ वर्षको अवधि भएका २० र ६ कर्मचारीलाई बर्खास्त गरिएको छ ।
साथै, स्थायी कर्मचारी तर्फ छैठौँ तहका कर्मचारी दानी ठाकुर र स्टोरका कर्मचारी भुला यादवलाई ५ वर्षकालागि ग्रेडबृद्धि रोक्कागर्ने सिफारिश गरिएकोछ।
नयाँ नियुक्ति गरिएका १० कर्मचारीलाई हटाएको बारेमा प्रमुख प्रशासकिय अधिकृत साहले भने, ‘नयाँ कर्मचारी नियुक्त गर्नका लागि परीक्षा लिइँदा अवजेक्टिभ प्रश्नपत्र बाहिरिएको गुनासो आएपछि नयाँ नियुक्ति भएका कर्मचारीहरुलाई हटाएको हुँ ।’
यसका साथै उनले कार्यविधि मिचेर करार कर्मचारी राखिएको र राज्यकोषको दुरुपयोग हुने गरी डोर हाजिरीमा कर्मचारी राखिएको भन्दै उनीहरूको नियुक्ति समेत खारेज गरिएको जानकारी दिए ।
प्रकाशित मिति: २०२५-०२-१७ , समय : २१:३७:३५ , १ महिना अगाडि